Matalik na Kaibigan

Sa buong buhay ko, madami akong naging kaibigan. Mapatanda o mas bata pa sa akin, di ko mabilang kung ilan ang mga naging malapit sa akin. Subalit, masasabi ko na pili lang ang mga matatalik kong kaibigan. Ano ba ang pagiging matalik na kaibigan para sa akin? Isa na dito ay pwedeng pagkatiwalaan sa kahit anong bagay. Pwede mong sabihin ang mga sikreto mo. Nandyan lang pag may problema ka. Yung tipikal na kaibigan pero ni-level up ng todo.

Grade 2 pa ako nung una kong nakilala ang aking unang matalik na kaibigan. Ang natatandaan ko lang kung paano ko siya nakilala ay dahil magkasundo kami ng class number sa klase. Grade 2 hanggang Grade 6 ko siya naging malapit na kaibigan. Sa mga taong yun, nasabi ko lahat ng mga sikreto ko sa kanya. Halos araw araw ako pumupunta sa bahay nila. Malapit na din ang mga pamilya niya sa pamilya ko. Minsan, iniisip ko na siya na lang ang kapatid ko. Sabi ko pa nga, magiging BFF o "Best friends forever" kami. Pero, nung high school na kami, pareho kami ng eskwelahan, subalit iba ang section niya. Ito ang simula ng aming huling relasyon bilang matalik na kaibigan. Parang bula na nawala ang pagiging close namin sa isa't isa. Mas nawala kami ng komunikasyon nung nag migrate na ako papuntang Amerika.

Bagong buhay, bagong kaibigan. Yan ang inisip ko nung nakarating ako sa Amerika. 2nd year high school nung dumating ako duon. Masasabi ko na may mga kaibigan din ako pero mas konti kay sa nung nandoon ako sa Pilipinas. Mahirap makisama sa mga taong laking Amerika o sinasabi naming "white-washed". Wala akong naging matalik na kaibigan nung high school. Puro "hang out buddies" o mga taong sinasamahan ko lang pag wala akong magawa, ang mga kasama ko. Sabi ko sa isip ko na sana matapos na ang high school at gusto ko nang umalis dito. Ito din ang dahilan kung bakit ayaw na ayaw kung ang high school.

Dumating ang kolehiyo at dito na nagbago ang buhay ko. Dito ko na nakilala ang masasabi kong pinaka matalik na kaibigan sa buong mundo. Parang mamamatay ako kung wala siya. Una ko siyang nakilala sa English class ko sa Ohlone College. Nung unang araw ng pasukan, sabi ng guro namin na makipagkilala sa katabi. Dito ko siya unang nakausap. Nung una, kala namin sa isa't isa na mga Fil-Am at di marunong mag Filipino. Nung lumipas ng ilang linggo, nagka-mabutihan kami at nalaman ko na Pilipino pala siya dahil mukha siyang Mexicano. Siya din kumbaga yung "bridge" sa pagkilala ko sa mga ibang kaibigan ko. Parang kung di ko siya nakilala, konti lang kaibigan ko kaya't sobrang nagpapasalamat ako sa kanya dahil nagbago ang buhay ko sa kanya. Sa sobrang close namin, lahat ng sikreto ko nasasabi ko sa kanya pati mga sobrang malalalim na sikreto ko, nasasabi ko rin. Pareho din sa kanya. Halos araw araw kami nagkakasama at text kami ng text. Sabi nga ng iba na "bromance" o dalawang lalaki na wala sekswal na relasyon pero sa sobrang malapit sa isa't isa para na silang mag boyfriend, pero wala lang sa amin yun. Nung nalaman niya na uuwi ako sa Pilipinas para tapusin ang kolehiyo ko, nalungkot siya pero di niya ito pinapakita at dinaan na lang ito sa pag bibiro. Nung araw ng flight ko, sumama siya sa airport para makapag paalam hanggang sa gate. Di ko siya makakalimutan.

Dito naman sa Pilipinas, di ko inisip na makaka fit in ako sa mga kaklase ko dahil nga sa age gap. 20 years old ako at 15-17 years old sila. Pero habang tumatagal ang panahon ko dito sa Pinas, nakaka-adjust ako sa mga kaklase ko at feeling ko na 17 ulit ako. Dahil dito, madami din ako naging kaibigan sa iba't ibang section ng Pre-Dentistry. Pero may naging malapit akong kaibigan dito. Medyo mas matanda siya sa akin kaya siguro siya lang naging ka close ko dito. Masasabi kong best friend ko siya, pero wala din papalit sa pinaka matalik kong kaibigan sa Amerika.

Sa buhay, masarap pag madami kang kasama, Mas masaya pag may isang tao na naiintindihan ka sa kahit anong aspeto ng buhay mo. Ito ang best friend. Nandyan palagi, may pakialam sayo, parang kapatid. Ito ang hinahanap ng kahit sino. Sabi nga nila, ang best friend, parang 4 leaf clover. Mahirap mahanap pero maswerte ka pag natagpuan mo siya.